Exit

Tinan barak ona, Klínika Bairo Pite serve populasaun Timor-Leste, no fornese tratamentu saúde ne’ebé kualidade di’ak no gratis. Ekipa boot doutór/a, enfermeiru/a, parteira no staff sira seluk husi Timor-Leste no rai li’ur mak servisu hamutuk hodi fó tratamentu saúde ne’e ba populasaun Timor-Leste.

Iha loron Segunda, 21 Agostu 2017, fundadór Klínika Bairo Pite, Dr Daniel Murphy hato’o katak nia hakarak servisu mesak iha klínika, no lakohi servisu hamutuk ho Klínika Bairo Pite (Timor-Leste), no Klínika Bairo Pite (Australia), ne’ebé estabelese iha 2010. Organizasaun rua refere ne’e estabelese iha 2010 hodi fornese servisu klíniku, administrasaun, no fundus ba Klínika Bairo Pite. Konsellu husi organizasaun rua ne’e agora daudaun suporta ekipa médiku iha Klínika Bairo Pite (ema atus ida resin), no investe osan no tempu barak ona ba sira-nia treinamentu no edukasaun.

Konsellu husi Klínika Bairo Pite (Australia), no Konsellu Konsulta Médiku koko halo ona negosiasaun ho Dr Daniel hodi enkoraja nia atu komesa servisu iha papél ne’ebé apropriadu liu ba nia agora, tanba Dr Daniel nia tinan boot ona, no mós tanba tratamentu saúde ba Timoroan ne’ebé kualidade di’ak mak importante liu. Konsellu refere hakarak Dr Daniel servisu iha papél foun ne’ebé foka ba sosializasaun klínika nia programa ba populasaun Timor-Leste, advokasia saúde, no hanorin. Klínika Bairo Pite (Australia) nia hakarak mak servisu hamutuk ho Dr Daniel ba oin, hodi kontinua servisu ne’ebé Dr Daniel realiza ona.

Ami triste tebes tanba Dr Daniel lakohi servisu nafatin ho konsellu sira hodi halo negosiasaun atu troka nia pozisaun ba pozisaun ne’ebé apropriadu liu, hodi asegura katak klínika sei susesu no di’ak liu tan iha futuru. Ho laran triste, Klínika Bairo Pite (Australia) tenke para suporta klínika iha Timor-Leste husi loron 26 Augusto 2017, tanba Dr Daniel lakohi servisu hamutuk ho ami hodi hetan solusaun di’ak, no tanba Dr. Daniel sei hakarak fó tratamentu diretamentu ba pasiente sein servisu hamutuk ho Konsellu Klínika ka Konsellu Konsulta Médiku.

Ami servisu maka’as atu asegura katak pasiente Klínika Bairo Pite sei hetan tratamentu saúde husi klínika no ospitál seluk iha Timor-Leste, no ami iha kometimentu boot nafatin atu ajuda no hadi’a saúde ba povu Timor-Leste. Se Dr. Daniel troka nia hanoin, no hili atu servisu hamutuk fali ho ami, ami sei kontente tebes no hakarak tebes atu servisu hamutuk ho nia.

Leave a reply

Your email address will not be published. Required fields are marked *